त्रिभुवन विश्वविद्यालय इन्जिनियरिङ अध्ययन संस्थान (आईओई) ले चर्को शुल्क वृद्धिको निर्णय तुरुन्त फिर्ता लिनुपर्ने भन्दै स्वतन्त्र विद्यार्थी युनियनले चेतावनी दिएको छ । आईओईले गरेको शुल्क वृद्धिको विरोधमा नेविसंघ पुल्चोक इन्जिनियरिङ क्याम्पसका इकाई अध्यक्ष सुलभ चापागाईँ आमरण अनशनमा हुनुहुन्छ ।

तस्बिरः स्ववियु नेपाल ल क्याम्पसको फेसबुक पेजबाट साभार ।

शुल्क वृद्धिको विरोधको आन्दोलनमा ऐक्यवद्धता जनाउँदै स्वतन्त्र विद्यार्थी युनियन नेपाल ल क्याम्पसका सभापति एवं त्रिवि सभाका आमन्त्रित सदस्य विष्णु ढुङ्गेलले विद्यार्थीको शिक्षा पाउने हकलाई नै कुठाराघात गर्ने गरी मनलाग्दी भरमा शुल्क बढाउन नपाइने चेतावनी दिनुभयो ।आईओईले २ लाख ८० हजारबाट वृद्धि गरेर शिक्षण शुल्क ७ लाख ७५ हजार पु¥याउनु चरम लापरवाही भएको भन्दै निर्णय तत्काल सच्चाउन उहाँले सुझाव दिनुभयो ।

शुल्क वृद्धि विरोधमा मंगलबारबाट सुरु गरिएको आन्दोलनमा स्ववियु, अनेरास्ववियु, अखिल क्रान्तिकारीलगायत विद्यार्थी संगठनले साथ दिएका छन् । विद्यार्थीहरुले शुल्क वृद्धि फिर्ता नलिएसम्म आन्दोलन जारी राख्ने जनाएका छन् ।

यसैबीच आईओईले साउन २५ गतेको निर्णयअनुसार २०५३ सालपछि शुल्क वृद्धि गरिएको जनाएको छ । वृद्धि भएको शुल्क आगामी शैक्षिक सत्रदेखि लागु हुने डिन कार्यालयले जनाएको छ ।

कार्यक्रममा अखिल (क्रान्तिकारी) नेपाल ल क्याम्पसको उपाध्यक्ष ओम प्रकाश सुनार ,अखिल (क्रान्तिकारी) चक्रवर्ती ल कलेजको अध्यक्ष सम्भु पन्त नेशनल ल कलेजको अध्यक्ष भावना शाह तथा सचीब सुबास अधिकारी लगायतको उपस्थिती थियो ।

स्वतन्त्र विद्यार्थी युनियन नेपाल ल क्याम्पसले जारी गरेको विज्ञप्तिको पूर्णपाठः

८ भदौ २०८०, शुक्रवार २१:०४ बजे प्रकाशित