NIC ASIA Bank Long Ad
Global IME Bank Long Ad

प्रेस सङ्ग्रहालयप्रति सरकार सकरात्मक ः सञ्चार मन्त्री कार्की

सञ्चार तथा सूचना प्रविधि मन्त्री ज्ञानेन्द्रबहादुर कार्कीले प्रेस काउन्सिल नेपालको संयोजनमा निर्माण हुन लागेको प्रेस सङ्ग्रहालय चाँडै अघि बढाउनुपर्नेमा नेपाल सरकार सकरात्मक रहेको बताउनुभएको छ ।

वर्षौंदेखि प्रचलनमा रहेका विभिन्न खालका छापाखाना मेसिन, छापामा प्रयोग हुने अन्य सामग्रीसहितको सङ्ग्रहालयका लागि काउन्सिलले तयारी गरिरहेको छ ।
आइतबार सञ्चारग्रामस्थित काउन्सिल अवलोकन गर्नेक्रममा सरकारका प्रवक्ता समेत रहनुभएका मन्त्री कार्कीले ऐतिहासिक महत्व राख्ने यो काम सम्पन्न गर्नका लागि सरकारले आवश्यक सहयोग गर्ने बताउनुभयो ।

सङ्ग्रहालय र काउन्सिलभित्र रहेका अनलाइन, रेडियो, प्रिन्ट र छापा माध्यम अनुगमन संयन्त्रबारे अवलोकनपछि बोल्दै उहाँले सेवा, सुविधा बढेसँगै काउन्सिलको प्रभावकारिता बढ्दै जानुपर्ने सुझाव समेत राख्नुभयो । काउन्सिललाई उदाहरणीय संस्था बनाई नेपाली प्रेसको अनुगमन र नियमनलाई प्रभावकारी बनाउनुपर्ने सुझाव उहाँको थियो ।

त्यसक्रममा प्रेस काउन्सिलका अध्यक्ष बालकृष्ण बस्नेतले स्वस्थ, मर्यादित, सन्तुलित र जिम्मेवार पत्रकारिता विकासका लागि नयाँ नयाँ कामको थालनी काउन्सिलबाट भइरहेको जानकारी दिनुभएको थियो ।

काउन्सिलले २४ सै घण्टा आर्काइभमार्फत रेकर्ड गर्दै आएको (रेडियो, टेलिभिजन, अनलाइन) अभिलेख प्रणाली, अनुगमन कक्ष, प्रेस सङ्ग्रहालयबारे जानकारी दिनुभयो । उहाँले मिल्दादुल्दा नामका अनलाइनलाई सुचीकरण नगर्ने, अनलाइन दर्ता अघि अनिवार्य अभिमुखीकरण कक्षामा बस्नुपर्ने, आचारसंहिता उलङ्घन गर्नेलाई आचारसंहिताको कक्षा दिइने गरेको, आचारसंहितालाई विभिन्न भाषामा अनुवाद गरिएको लगायतका कामहरू भएको जानकारी दिनुभयो ।
प्रेस काउन्सिल कर्मचारी विनियमावली र प्रेस काउन्सिल आर्थिक प्रशासन विनियमावली तत्काल संशोधन गर्नुपर्ने, प्रेस काउन्सिल ऐन २०४८ मा उल्लेख भएका कतिपय प्रावधान संसोधनका लागि पेस भएकाले शीघ्र अघि बढाउनुपर्ने, काउन्सिलालई स्रोतसाधन सम्पन्न बनाउनका लागि बस्नेतले सरकारको ध्यानाकर्षण समेत गराउनुएको थियो ।

उपप्रशासकीय अधिकृत रामशरण बोहराले अनुगमन गर्ने तरिका, डाटा स्टोरेज, काउन्सिलमा रहेको अभिलेख प्रणाली लगायतका विषयमा जानकारी गराउनुभयो ।सञ्चार मन्त्री कार्की र सञ्चार सचिव डा. वैकुण्ठ अर्याल सञ्चार ग्राम अवलोकन गर्नेक्रममा काउन्सिल पुग्नुभएको थियो ।
भ्रमणकाक्रममा मन्त्री कार्कीलाई अध्यक्ष बालकृष्ण बस्नेत, काउन्सिल सदस्य एवं पत्रकार महासङ्घका अध्यक्ष विपुल पोख्रेल, अर्का सदस्य दुर्गा भण्डारी, मुख्य अधिकृत झबिन्द्र भुसाल, वरिष्ठ प्रशासकीय अधिकृत दीपक खनालसहित कर्मचारीहरूले पुष्पगुच्छाले स्वागत गर्नुभएको थियो ।

१९ असार २०७९, आइतवार १६:५९ बजे प्रकाशित

प्रतिक्रिया दिनुहोस्

सम्बन्धित शीर्षकहरु